top of page
BannerAU02.jpg

Land Acknowledgement

Ula kina’masuti etliaq Mi’kma’ki, wmɨtkiwow aqq mna’q iknmuetasinuk wmaqamikew Mi’kmaq. Mi’kmaq wikultijik ula tett weja’tekemk 13,500 te’sipunqɨkl. Mui’watmek na wejkwa’taqnikewey aqq siawa’sin alsusutimuow Mi’kmaq kiskuk. Nenuite’tmekl ta’n tela’luekl qame’kewaq ketu’ tla’tu’tipnn koqoe’l L’nui utanl ta’n nike’ telui’tmu’kw Kanata. Kepmite’tmu’kl Wantaqo’tie’l aqq Witaptultimkewe’l tela’matultimkewe’l mesqnwi’kmi’tipnn Wapna’kikewaq aqq Kaplnu’l. Nestmu’tiek tela’matultimkewe’l Kelo’tmua’tij wejkuiaqmual Mi’kmaq aqq nenuite’tmek ula wije’l tela’matultimkewe’l eltu’tij amujpa ta’n tla’teketew Kaplnu’l. Kinu na msɨt tela’matultimkewaq.

Ninen

Aknutmɨk Mi’kma’ki na pukweli ankaptmɨk tli ewi’kikemkewey kekina’masuti ta’n la’lata kekina’masultijik Mi’kmawe’l utanl kina’masultinew, jiksɨtmnew, tko’taqɨtinew, aqq l’tunew aknutmaqnn. Eymu’tiek Mi’kma’ki, wmɨtkiwow L’nu’k (mimajuinu’k) aqq elt telnenujik Mi’kmaq, na a’tukwaqnminal wesku’tmi’tij Mi’kmawey telo’ltimkɨp, wejkwa’taqnikewey aqq kiskuk Utanl ta’n teliaq. Katu ta’n ketu’ tla’taqɨtiek na kina’muanen nutqo’ltijik ewi’kikɨtijik ta’n maw klu’lk tel wi’kmɨk aknutmaqnn ta’n pasɨk teken L’nuey Utan ta’n nike’ kiskuk telui’tmu’kw Kanata.

Tali apaja’tu’kw L’nuita’simk aknutmaqniktuk? Aknutmik Mi’kma’ki, kesiwi’tmekl newkl teplutaqnn; kepmite’taqn, wpitnk wen etek, tela’matultimk aqq asita’taqn. Talaptmikl ula e’wmik? Kpitnk ika’tu’n aknutmaqn, eta! Katu me’ atelk aqq na, pekiji I’mu’tiek utank. Apoqnmua’tiek, mawmijisultiekik kisiku’k aqq teko’tmu’tiek telo’ltimk. Kekina’masultiek, tepsiktmu’tiekl napuite’taqnn, jiksitmekl Mi’kmaq wklusuaqnmual aqq kisa’tuekl  a’tukwaqnminal msinimnew kijka piluatuekl aqq telaptmikl ta’n nuta’ql wjit a’tukwaqnmual L’nu’k.

Wela’lioq, L’nuioq ta’n apoqnmatmoq ewi’kikemkewey kekina’masuti kisa’sin!  Msit No’kmaq.

bottom of page